Калі мы апынаемся далёка ад дому, памяць пра яго робіцца вастрэйшай. Эміграцыя прымушае задаваць пытанні, якія раней здаваліся відавочнымі: хто мы, адкуль наша культура, дзе праходзяць межы таго, што можна назваць «сваім»? У пошуках адказаў мы звяртаемся да каранёў — часам нечаканых, часам схаваных у чужых музеях і гарадах.
Гэта будзе дыялог паміж мінулым і сучаснасцю, паміж музеем і наведвальнікам, паміж намі самімі. Мы будзем углядацца, пазнаваць, дапаўняць агульную карціну — і, магчыма, адкрываць уласныя сувязі з культурай, якая працягвае жыць, пакуль мы яе шукаем.
Разам з мастацтвазнаўцай і музейнай спецыялісткай Ганнай Маліноўскай @anna.malinouska мы запрашаем вас на асаблівую прагулку па Нацыянальным музеі ў Варшаве — падарожжа ў пошуках слядоў нашай культуры, схаваных сярод артэфактаў Рэчы Паспалітай. Некалькі стагоддзяў таму нашы землі былі часткай агульнай прасторы — і беларускія мастакі, рамеснікі, мысляры стваралі ў ёй нароўні з іншымі.
Мы паглядзім на прадметы побыту, іконы, жывапіс, дэкаратыўна-прыкладное мастацтва, створаныя на тэрыторыі сучаснай Беларусі або людзьмі, чые карані — у беларускай зямлі. І паставім пытанні:
Хто яны? Якімі шляхамі іх лёсы прывялі сюды? І чаму гэтыя творы мы можам — і павінны — адчуваць як сваю спадчыну?
**Квiток у музей уключаны ў кошт.**